Turn Up Your Support

MPR News helps you turn down the noise and build shared understanding. Turn up your support for this public resource and keep trusted journalism accessible to all.

Tus Tswv Xeev Minnesota: Kev Xaiv Tsa Thawj Zaug Ntawm Tog Democratic

Thomas Evenstad and Jason Haarsager

Yog vim li cas koj thiaj tuaj sib tw?

“Nyob Zoo Cov Neeg Pov Npav Xaiv Tsa Hauv Minnesota! Kuv tuaj sib tw txhawm rau pov thaiv cov me nyuam, txhawb kom cov niam txiv muaj feem txiav txim siab txog lawv cov me nyuam thiab ua tus saib xyuas peb Cov Kev Nom Tswv Uas Cais Raws Tog Ntawm Cov Neeg Tsim Cai Lij Choj Hauv Xeev ua rau peb cov me nyuam raug teeb meem loj xws li raug tua, nyiaj txiag ntau txhiab lab duas las ntawm cov neeg txom nyem thiab cov neeg xav tau kev pab tshaj plaws raug tsis saib xyuas, thiab ua kom kuv xav coj kev ncaj ncees, kev coj zoo, thiab kev ntseeg sab ntsuj plig rov qab los rau Chaw Ua Hauj Lwm Tus Tswv Xeev. Kuv sib tw ua tus Tswv Xeev kom tau txais kev ncaj ncees rau kuv tus kheej, vim kuv raug tsis pub sib tw tau li 27 xyoo lawm tom qab kuv raug iab liam tias muaj txim los ntawm Amy KLOBUCHAR thiab Lub Xeev Uas Tub Ceev Xwm Tswj (Police State) Lub Khoos Kas New York Innocence TAU ROV QHIB HAIS DUA KLOBUCHARS rooj plaub thiab kuv cia siab tias yuav qhia tau Kev Dawb Huv nyob rau xyoo 2027. Kuv tuaj sib tw ua txhawm kom pab txo tau tus nqi siv nyiaj hauv koj lub neej los ntawm kev tshem tawm se Vaj Tsev, txo kev ua phem txhaum cai li 60-64% raws li kuv TSAB CAI VDP thiab los tiv thaiv thiab pov thaiv peb cov neeg nyob hauv Xeev kom tsis txhob raug Tsoom Fwv Tebchaws ua phem dhau cai thiab tsim txom!”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Kuv cov kev paub dhau los hauv kuv lub neej txij thaum kuv yug nyob rau hauv Springfield IL, loj hlob nyob rau hauv Edina MN tau txais kev kawm zoo heev nyob rau ncua sij hawm xyoo 1970 thiab '80' kuv cov kev paub dhau los tau ua rau kuv xav los nrhiav txoj hauj lwm Ua Tus Tswv Xeev Minnesota Thaum ub kuv yog ib tug neeg muag khoom thiab lub Grateful Deadhead uas tau mus saib kev ua yeeb yam 60 zaug thiab kuv tau pom txog qhov kev sib koom muaj zog ntawm zej zog thiab pab pawg ntaus nkauj no, uas tau hla dhau qhov qub-qub mus rau qhov tshwj xeeb tshaj plaws. Kuv Qhov Kev Raug Txiav Txim Rau Txim Yuam Kev uas yog ib qhov tu siab heev 27 xyoo dhau los kuv tseem tab tom tawm tsam nrhiav kev ncaj ncees txog qhov ntawd. Kuv tau qib siab tshaj hauv xeev Minnesota nyob rau Fab Kev Ua Hauj Lwm Tiv Thaiv Kev Nyab Xeeb Rau Pej Xeem, vim kuv yog tus pib siv GPS Los Saib Xyuas thiab Taug Qab cov neeg ua txhaum cai kev sib deev muaj tiag xyoo 2003. Kuv TSAB CAI VDP tau txo kev siv phom ua phem txog 64% thiab kev pab lwm tus tau ua rau kuv xav rov qab los sib tw ua Ua Tus Tswv Xeev: Nom Tswv rov qab los ua hauj lwm rau pej xeem, kuv ntseeg tias tsoom fwv yuav tsum yog tsoom fwv ntawm cov pej xeem, tsim los ntawm cov pej xeem, thiab ua hauj lwm pab cov pej xeem.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Kev Ua Txhaum Cai. Nws yog yam kuv paub zoo thiab tib neeg xav tau Kev Nyab Xeeb Rau Pej Xeem thiab tsis yog tsab cai raug nqi $1.75 Txhiab Lab Amy KLOBUCHAR, Minnesota Yog Ib Lub Xeev Tub Ceev Xwm. Tom qab ntawd #2 Tus Nqi Nyiaj Siv Rau Kev Ua Neej Nyob/KEV DAG NTXIAS: kuv tab tom tshem tawm cov se Vaj Tsev thiab muab vaj tsev rau txhua tus neeg nyob hauv Minnesota uas siv nyiaj los ntawm pob peev nyiaj pab Kev Tiv Thaiv Kev Nyab Xeeb Rau Pej Xeem thiab Kev Saib Xyuas Cov Neeg Ua Txhaum Cai thiab Kev Hais Plaub Ntug TSIS ZOO rau cov neeg pib rooj plaub, nrog rau kev txhim kho kev nyab xeeb rau pej xeem. 3) Kev Tsim Txom Los Ntawm Tsoom Fwv Tebchaws ICE Lub Chaw Ua Hauj Lwm Tswj Kev Ruaj Ntseg Hauv Teb Chaws (DHS): Tsis muaj leej twg yuav muaj zog dua los sis raug sim ntau dua li kuv lawm. Kuv yog ib tug neeg dim ntawm kev uas raug Amy KLOBUCHAR liam tias ua txhaum cai tau 27 xyoo. Kuv twb qhia rau Thawj Pwm Tsav Trump lawm tias yuav tsis txais tos ICE tuaj hauv Minnesota yog tsis tau kuv li kev tso cai meej thiab yog tau txais kev tso cai, yuav tsum muaj tus qauv cai suav nrog kev xa kuv cov neeg uas koom nrog hauv txhua cov hauj lwm "uas yuav tau ua". Kuv yuav tiv thaiv thiab pov hwm cov neeg nyob hauv Minnesota.”

Bill E. Gates J.R. and Leah Harris

Yog vim li cas koj thiaj tuaj sib tw?

“Vim yog Minnesota xav tau tus thawj coj uas tuaj yeem tswj xwm txheej ceev ua ntej nws dhau los ua xwm txheej kub ntxhov. Kuv tuaj sib tw ua Tswv Xeev vim kuv ntseeg tias tsoom fwv yuav tsum ua hauj lwm raws li siv tau tiag, lav ris rau yam nws ua, thiab tsom rau cov txiaj ntsig. Cov neeg hauv Minnesota tsim nyog tau txais cov thawj coj uas tuaj yeem tuaj koom tiag, ua cov kev txiav txim, thiab daws cov teeb meem thaum cov teeb meem kev cov nyom tshwm sim. Kuv pom tias tsoom fwv ua tau hauj lwm zoo, thiab kuv tej qhov uas tsoom fwv ua tsis tau zoo. Minnesota muaj peev xwm loj heev, tab sis yog peev xwm xwb ces tseem tsis txaus. Peb yuav tsum tsim ib cov nom tswv uas ua hauj lwm rau pej xeem, siv nyiaj txiag kom muaj lub luag hauj lwm, thiab npaj rau yav tom ntej. Minnesota tsim nyog yog ib qhov chaw ua rau tib neeg muaj kev kaj siab, tsis yog qhov chaw ua rau neeg txhawj txog se, thiab tom qab ntawd peb tuaj yeem tsim kom Minnesota zoo dua rau txhua tus.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Kuv qhov kev txiav txim siab tuaj sib tw ua Tswv Xeev yog los ntawm yam kev paub dhau los uas tau ntsib hauv lub neej. Kuv tau ua hauj lwm hauv fab kev kawm, kev thauj mus los, kev tos txais qhua, kev ruaj ntseg, kev tsim kho hauj lwm, thiab kev pab cuam zej tsoom. Kuv tau ntsib kev saib xyuas me nyuam ntsuag, kev nyuaj siab txog kev lag luam, kev xiam oob qhab, thiab cov kev cov nyom uas ntau cov tsev neeg ua hauj lwm ntsib txhua hnub thiab. Cov kev paub dhau los ntawd tau ua rau kuv nkag siab ntawm tus kheej tias nom tswv cov cai cuam tshuam rau cov neeg hauv lub neej tiag li cas. Tsis yog saib cov teeb meem los ntawm ib txoj kev xaiv xwb, kuv tau nyob thiab tau ua hauj lwm nrog cov neeg los ntawm ntau yam keeb kwm thiab cov hauj lwm. Kev paub dhau los ntau yam ntawd ua rau kuv ntseeg tias tsoom fwv yuav tsum lav ris rau yam lawv ua, ua hauj lwm raws li qhov ua tau tiag, thiab tsom rau kev tsim tau txiaj ntsig rau txhua cov neeg nyob hauv Minnesota.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Cov teeb meem kuv hnov heev tshaj plaws yog nyiaj siv hauv lub neej, kev kawm, nom tswv kev lav ris, kev nyab xeeb rau pej xeem, thiab vaj tsev nyob. Cov tsev neeg txhawj tias tsam pheej nce nqi khoom thiab tsis hais lawv tuaj yeem tsim tau lub neej zoo hauv Minnesota los xij. Hauv fab kev kawm, kuv nyiam nug tias: Yog tub ceev xwm tsis tau them nyiaj yuav cov mos txwv lawv siv, hos vim li cas cov kws qhia ntawv thiaj li tau them nyiaj yuav lawv cov cwj mem lawv siv? Cov kws qhia ntawv tsim nyog muaj cov khoom siv lawv xav tau los qhia peb cov me nyuam yam tsis tau siv lawv tus kheej cov nyiaj los yuav. Dhau li ntawd lawm cov neeg tawm suab xav kom muaj kev ntseeg siab tias cov nyiaj pab rau pej xeem raug siv yam uas muaj kev lav ris, cov zej zog tseem muaj kev nyab xeeb, thiab ua kom vaj tsev pheej yig dua. Qhov kuv tsom kwm mas yog rau cov kev daws teeb meem uas ua tau tiag los pab ua kom muaj hwv tsam zoo dua thoob plaws Minnesota thiab ua kom ntseeg siab tias nom tswv tseem lav ris rau cov neeg uas nws ua hauj lwm pab.”

Amy Klobuchar and Ben Schierer

Yog vim li cas koj thiaj tuaj sib tw?

“Kuv hlub Minnesota, thiab kuv xav ua hauj lwm txhawm rau txhim kho tib neeg lub neej zoo dua. Kuv tsis xav kom txhua tus nyob li qub kuv xav ua tus tswv xeev tsim kev hloov pauv tshiab. Qhov ntawd txhais tau tias kuv xav ua kom tsoom fwv hauv xeev ua hauj lwm tau zoo dua, muaj tswv yim tshiab dua, thiab muaj kev lav ris ntau dua, suav nrog kev tshem tawm kev dag ntxias thiab kev tiv thaiv kom txhob muaj kev dag ntxias tshwm sim thaum pib. Nws txhais tias yog kev txo cov nqi rau cov neeg hauv Minnesota uas them ntau dhau rau kev saib xyuas kev noj qab haus huv, kev saib xyuas me nyuam yaus, thiab vaj tsev nyob. Peb tsis xav kom tus tswv xeev tsuas yog mloog raws li tsoom fwv Trump hais xwb, thiab kuv yuav sawv cev rau yam yog thiab kho yam tsis yog. Kuv muaj keeb kwm ntev txog kev coj cov neeg hauv Minnesota tuaj nyob ua ke kom koom tes ua kom tiav cov hom phiaj thiab tsim tau cov txiaj ntsig zoo, thiab ntawd yog yam kuv yuav ua tam li yog tus tswv xeev.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Kuv yeej tsis tau thim rov qab thaum ntsib tej teeb meem nyuaj, tshwj xeeb yog thaum yuav tsum sawv cev thiab tawm tsam kom tau yam zoo rau cov neeg hauv Minnesota. Kuv pib koom nrog kev nom kev tswv tom qab John thiab kuv muaj ib tug ntxhais hu ua Abigail. Abigail nqos tsis tau zaub mov noj thiab yuav tsum tau mus saib xyuas hauv chav kho mob hnyav, tab sis kuv tau tawm tsev kho mob tom qab 24 teev vim yog cov cai kev tuav pov hwm. Kuv tau los ua tus thawj coj tseem ceeb hauv kev txhawb nqa ib qho ntawm thawj txoj cai lij choj hauv tebchaws uas lav kom cov niam tshiab thiab cov me nyuam mos nyob hauv tsev kho mob tau tsawg kawg 48 teev tom qab yug me nyuam. Tom qab kuv ua tau hauj lwm ntau xyoo hauv chaw hauj lwm ntiag tug, kuv tau los ua tus thawj coj ntawm lub chaw lij choj foob neeg ua txhaum cai loj tshaj plaws hauv Minnesota, uas kuv tau tawm tsam kev ua txhaum cai hnyav, kev dag ntxias, thiab kev noj nyiaj txiag. Thaum kuv ua tswv cuab hauv Xab Phas, kuv tau raug xaiv tsa ua tus thib 1 rau kev tsim tsa cov cai uas ob tog nom tswv txhawb nqa thiab raug xaiv tsa ua tus thib 3 ntawm 100 tswv cuab rau kev tsim cai lij choj tiag. Tam li yog tus tswv xeev kuv yuav coj tib txoj kev ua hauj lwm no los siv kom ua tiav tej hom phiaj thiab tsim tau cov txiaj ntsig zoo.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Txhua qhov chaw kuv mus, kuv hnov cov neeg hauv Minnesota hais txog kev nce cov nqi. Txhim kho kom tib neeg muaj lub neej zoo, peb yuav tsum pab cov neeg uas tab tom ntsib teeb meem nyuaj hauv kev them nqi rau kev saib xyuas kev noj qab haus huv, nrhiav kev saib xyuas me nyuam tus nqi pheej yig, los sis yuav tsev. Qhov ntawd txhais tau tias yuav txiav cov kev cai nyuaj thiab ua hauj lwm nrog lub chaw hauj lwm ntiag tug los tsim tsev nyob ntxiv, pab kom siv tau kev saib xyuas me nyuam tus nqi pheej yig, thiab tawm tsam cov Tuam Txhab Tsim Tshuaj Loj kom txo tau nqi tshuaj kho mob raws ntawv sau yuav. Dhau li ntawd lawm kuv yuav pib tshuaj xyuas cov koom haum ntawm xeev txhua yam kom meej txij thaum pib mus txog kawg, kom daws tau cov teeb meem kev dag ntxias. Kuv yuav rau txim rau cov neeg raug txim txhaum cai ntxiv, yuav txwv cov neeg ua hauj lwm muaj ntaub ntawv cog lus uas pom tias muaj kev dag ntxias kom tsis pub tau nyiaj pab los sis daim ntawv cog lus ua hauj lwm, thiab yuav tsum kom cov neeg ntsuam xyuas mus xyuas qhov chaw ua hauj lwm kiag ntawm tus kheej yam tsis ceeb toom ua ntej. Kuv yuav txhim kho tub ntxhais kawm txoj kev kawm kom zoo dua thiab ua hauj lwm nrog cov lag luam los nthuav dav peb li lag luam thiab tsim kom tau cov hauj lwm them nyiaj zoo thiab tsim nyog rau cov neeg mob siab ua hauj lwm.”

Kobey J Layne and Paul Ference

Yog vim li cas koj thiaj tuaj sib tw?

“Minnesota tab tom ntsib teeb meem loj, vim tsoom fwv teb chaws tab tom ua rau muaj kev phom sij ntau dua rau cov pej xeem uas Minnesota muaj lub luag hauj lwm yuav tsum tiv thaiv. Operation Metro Surge tau qhia rau peb pom tias yuav muaj dab tsi tshwm sim thaum tsoom fwv siv lub hwj chim los nkag rau hauv peb cov zej zog yam tsis muaj kev lav ris. Cov neeg ua hauj lwm tsis tau txais lawv cov nyiaj hli. Cov tsev neeg tuaj tsis raws teem caij. Cov lag luam me poob tej qhua yuav khoom. Cov chaw saib xyuas me nyuam pom tias cov tsev neeg maj mam tsis tuaj lawm, vim cov niam txiv ntshai tawm hauv tsev. Thaum Operation Metro Surge pib tshwm sim, kuv tau koom tes nrog kuv cov neeg zej zog los sib pab. Kev koom tes ua hauj lwm nrog kuv cov neeg zej zog nws ua rau kuv lub siab xav siv zog. Thaum kev sib tw xaiv tsa Tswv Xeev pib zoo li tsis muaj ib tug neeg tuaj sib tw uas muaj lub tswv yim zoo yuav tawm los sib tw rau lub sij hawm tseem ceeb hauv keeb kwm, kuv paub tias kuv yuav tsum sawv los ua tus sib tw. Yog vim li ntawd kuv thiaj tuaj sib tw ua Tus Tswv Xeev Minnesota.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Thaum cov pej xeem sib koom siab thiab thov kom cov thawj coj mloog lawv hais, lawv yeej tuaj yeem yeej tau. Kuv tab tom tuaj sib tw ua tswv xeev vim cov neeg hauv Minnesota coob dhau tsis ntseeg lawm tias qhov ntawd muaj tseeb, thiab kuv tsis liam lawv. Tam li yog ib tug neeg ua hauj lwm, kuv nkag siab tias nqi xauj nce ceev dua nyiaj hli. Cov khoom noj haus nqi kim dua txhua hli. Kev nrhiav neeg pab saib xyuas me nyuam, niam txiv, los sis koj tus kheej yog ib qho nyuaj heev thiab tej nqi them rau kev saib xyuas no kuj kim heev. Nws tsis tas yuav nyob li no mus tas li. Muaj ntau txoj kev xaiv tau, thiab tus tswv xeev yog tus neeg ua hauj lwm pab pej xeem uas tuaj yeem txiav txim siab xaiv tau cov ntawd. Vim kev sib tw xaiv tsa no xav tau ib tug neeg sib tw uas muaj tswv yim, kuv thiaj txiav txim siab sawv los ua lub luag hauj lwm kom txo cov nqi, kho kom tsoom fwv zoo dua, thiab pov thaiv peb thaj av, dej, thiab kev ywj pheej.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Ua ntej no: Txo tus nqi koj them. Ua kom muaj tsev ntau dua. Tus nqi xauj tsev yuav tsum tsis siab dua cov nyiaj hli. Txo cov nqi tshuaj kho mob thiab kho mob. Cov tsev kho mob nyob tuaj ntug uas qhib pab cuam tas li. Lub koom haum tswj xyuas nqi dej hluav taws xob uas lav ris rau koj. Koj peev nyiaj pab txhua hli yog daim npav tshaj tawm. Qhov thib ob: Kev tswj hwm tsoom fwv kom muaj kev ncaj ncees — yuav muab cov cai coj ncaj ncees siv txij thawj hnub pib ua hauj lwm, txwv tsis pub siv cov ntaub ntawv sab hauv los yuav thiab muag peev nyiaj lag luam, yuav tsum tshaj tawm rau pej xeem txog tej kev tsis sib haum xeeb, pov thaiv cov neeg qhia tawm txog kev ua txhaum cai, thiab tsim ib daim ntawv qhia rau pej xeem uas qhia cov npe, cov hauj lwm tseem tshuav, thiab lub sij hawm kawg kom txhua tus tuaj yeem pom. Thib peb: Pov thaiv koj thaj av, dej, thiab kev ywj pheej. Kev Pov Thaiv Cov Dej Ciam Teb Ua kom cov dej haus huv si, pib los ntawm kev tshem cov nitrate tawm ntawm cov qhov dej hauv cov liaj teb nyob tuaj ntug. Kev pov thaiv txoj cai tsis pub kom nom tswv cuam tshuam ncua ntawm koj thiab koj tus kws kho mob. Zoo siab txais tos thiab tiv thaiv peb cov neeg zej zog uas yog 2SLGBTQIA+. Ua ib tug neeg zej zog zoo rau peb cov zej zog Neeg Tsiv Teb Tsaws Chaw.”

Ole "Viking" Savior and Ashley "Skol" Johnson

As of publishing, these candidates have not responded.

Po Vang and Mark Frascone

Yog vim li cas koj thiaj tuaj sib tw?

“Kuv tuaj sib tw vim kuv tau pom kuv tus tij laug txoj kev noj qab haus huv poob qis zuj zus vim kab mob Charcot-Marie-Tooth (CMT), kab mob hlwb uas kho tsis txawj zoo tu qab uas kuv kuj muaj thiab. Pom nws yuav tsum mus rau hauv tsev kho mob thiab tawm hauv tsev kho mob tas li thaum cov nqi kho mob tseem nce ntxiv, ua rau kuv ntseeg tias Minnesota muaj peev xwm ua tau zoo dua no. Tsis muaj ib tsev neeg twg yuav tsum tau tawm tsam kom tau txais kev saib xyuas uas lawv xav tau. Kuv xav kom Minnesota cov qauv cai saib xyuas kev noj qab haus huv sib npaug nrog qauv cai zoo tshaj plaws hauv sab Tebchaws Europe, siv technology kho mob tshiab tshaj plaws, txo nqi rau cov tsev neeg ua hauj lwm, txhawb kev tiv thaiv kab mob uas kho tsis txawj zoo tu qab, thiab muab cov neeg mob saib ua qhov tseem ceeb ua ntej cov nyiaj paj. Dhau li ntawd lawm kuv kuj xav pov thaiv kom Minnesota txhob raug xaiv mus koom Epstein rau lawv kob tsov rog Epstein. Nom tswv tsim nyog ua hauj lwm pov thaiv cov neeg li ib txwm, tsis yog rau cov pawg neeg muaj nyiaj tshwj xeeb xwb.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Kev paub dhau los uas ua rau kuv txiav txim siab los nrhiav txoj hauj lwm no yog kev paub dhau los ntiag tug. Kuv tus tij laug thiab kuv muaj kab mob Charcot-Marie-Tooth (CMT), kab mob hlwb uas kho tsis txawj zoo tu qab. Pom nws txoj kev noj qab haus huv poob qis zuj zus thiab pom nws mus hauv tsev kho mob thiab tawm tsev kho mob ua rau kuv pom meej tias kev saib xyuas kev noj qab haus huv nyuaj dua npaum li cas thiab raug nqi npaum li cas rau cov tsev neeg li ib txwm. Kev muaj kab mob CMT tseem ua rau kuv muaj kev paub ncaj qha hauv kev tswj txheej teg kev ua hauj lwm saib xyuas kev noj qab haus huv. Kuv kuj muaj cov neeg hauv tsev neeg uas ua hauj lwm hauv tub rog thiab lwm cov uas ua hauj lwm tub rog niaj hnub no. Tej yam uas kuv tau ntsib no ua rau kuv ntseeg tias Minnesota ua tau zoo dua. Kuv xav txo cov nqi saib xyuas kev noj qab haus huv kom tsawg, txhim kho cov txiaj ntsig, txhawb kev tiv thaiv kab mob uas kho tsis txawj zoo tu qab, thiab tsim txheej teg kev ua hauj lwm uas muab cov neeg mob saib tseem ceeb ua ntej cov nyiaj paj, tsis yog cov pawg neeg muaj nyiaj tshwj xeeb.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Txoj Kev Npau Suav Li Neeg Meskas Thoob Ntiaj Teb: Tiv thaiv tsov rog thiab tiv thaiv ICE; pov thaiv kom Minnesota txhob raug xaiv koom nrog pawg Epstein. Tiv Thaiv AIPAC/Israel; txwv tsis pub AIPAC/Israel cuam tshuam cov nom tswv. Sau se ntawm cov neeg nplua nuj; sau se ntawm cov neeg nplua nuj heev thiab cov neeg muaj nyiaj ntau heev xws li pawg epstein, tshem tawm tag nrho se vaj tsev, nyiaj khwv tau los, thiab se muag khoom. kev saib xyuas kev noj qab haus huv tseem ceeb rau txhua tus; txo nqi saib xyuas kev noj qab haus huv thiab kev tuav pov hwm kom qis heev. nyiaj khwv tau los tseem ceeb rau txhua tus; muab 1 txoj hauj lwm uas them rau 1 tsev neeg; 1 tug txiv neej, 1 ib txoj hauj lwm, thiab 1 ib tsev neeg. kev ua liaj teb tseem ceeb rau txhua tus; kev ua liaj teb rov tsim dua tshiab, txhim kho av kom muaj khoom noj muaj txiaj ntsig ntau. cov khoom noj uas cog siv chiv nroj tsuag rau txhua tus; ua kom siv tau cov khoom cog siv chiv nroj tsuag tiag, kom cov neeg yuav tau zaub mov ncaj qha ntawm cov neeg tsim khoom thiab muag mis nyuj uas tsis tau muab tua kab mob. Vaj tsev nyob thiab kev thauj mus los tus nqi them taus rau txhua tus, txo nqi vaj tsev nyob thiab cov tsheb. Saib xyuas cheeb tsam huab cua ib puag ncig, tu dej haus kom huv, tsis muaj chaw saib xyuas ntaub ntawv AI. Cov cai no txo nqi kev ua neej nyob”

Mohammad Wazwaz and Murad Alshlool

As of publishing, these candidates have not responded.

Tus Tswv Xeev Minnesota: Kev Xaiv Tsa Thawj Zaug Ntawm Tog Republican

Loner Blue and Andrew Maass

This candidate declined to comment.

Lisa Demuth and Ryan Wilson

Yog vim li cas koj thiaj tuaj sib tw?

“Kuv tuaj sib tw ua tus tswv xeev kom txwv tsis pub muaj kev dag ntxias peb nyiaj se thiab rov qab kho kom lub xeev muaj kev ruaj ntseg txog nyiaj txiag. Nyob rau xyoo 2023 thiab 2024 thaum Tim Walz thiab nws cov phooj ywg hauv tog Democrat muaj kev tswj hwm tsoom fwv ntawm peb lub xeev, lawv tau nce peb cov se ntau txog kaum txhiab lab duas las, nce peev nyiaj siv ntawm xeev yuav luag 40% thiab siv txoj cai tswj hwm uas ua rau muaj kev sib cais thiab muaj kev cuam tshuam ntau dhau los ntawm kev xaiv nom tswv, uas tau ua rau peb tsev neeg thiab cov lag luam raug teeb meem. Thaum kuv tau raug xaiv los ua Tus Thawj Coj Ntawm Pawg Sawv Cev lub xyoo dhau los, kuv tau ua tus coj tawm tsam tiv thaiv kom txo kev dag ntxias, txwv tsis pub nce se thiab txo peb lub xeev pob peev nyiaj pab kom qis zog li $5 txhiab lab. Kuv npaj txhij yuav los coj Minnesota Kom Rov Qab Muaj Zog Dua.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Kuv yog ib leej niam ntawm plaub leeg me nyuam, yog ib leej pog ntawm xya leeg me nyuam, yog tus tswv lag luam, yog neeg hauv Minnesota yug, thiab Tus Thawj Coj Ntawm Pawg Sawv Cev Xeev Minnesota. Ua ntej kuv nkag los ua tswv cuab hauv pawg tsim cai lij choj 7 lub xyoo dhau los, kuv tau ua hauj lwm ua tswv cuab pab pawg thawj coj saib xyuas tsev kawm ntawv hauv zej zog tau peb ncua sij hawm. Tam li yog Tus Thawj Coj Ntawm Pab Pawg Sawv Cev kuv tau coj ua hauj lwm kom txo tau kev dag ntxias siv peb li nyiaj se thiab nrog rau kev tiv thaiv kom tsis txhob muaj kev nce se thiab kev siv nyiaj ntau dhau uas tswj tsis tau uas tog Democrats tau yuam rau cov neeg Minnesota thaum lawv tswj hwm tag nrho tsoom fwv. Kuv tuaj sib tw ua tus tswv xeev kom coj tau peb lub xeev zoo vim kuv ntseeg tias tom qab 16 xyoo dhau los tog Democrat kev ua tus coj hauv fab kev tswj ua tsis tau zoo. Kuv tsis yog ib tug neeg ua nom ua tswv uas ua hauj lwm nom tswv tas kuv lub neej, tab sis kuv muaj kev txawj txog kev ua thawj coj thiab kev paub dhau los-los sawv cev rau cov neeg Minnesota thiab coj peb lub xeev rov qab yog ib qho chaw uas cov tsev neeg tuaj yeem them taus rau lawv txoj kev ua neej nyob.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Cov neeg hauv Minnesota tau dhuav lawm vim lawv cov nyiaj se raug muab siv pov tseg rau txoj cai tsis zoo thiab raug cov neeg dag ntxias nyiag. Tam li yog ib tug nom tswv kuv yuav ntiab cov neeg uas muaj lub luag hauj lwm dag ntxias. Kuv yuav txiav cov se rau cov tsev neeg uas ua hauj lwm thiab cov lag luam, tshem tawm cov se xaus saus rau peb cov neeg laus, tiv thaiv kev ua kis las rau cov ntxhais thiab txhawb nqa kev nyab xeeb rau zej tsoom kom ua peb cov kev nyab xeeb dua ib zaug ntxiv. Kuv yuav txwv tsis pub tej kev qhia los sis kev xav uas ua rau tib neeg sib cais hauv ntau chav kawm ntawv, thiab kuv yuav tsom ntsoov rau kev txhim kho kev kawm kom zoo rau cov me nyuam yaus kom lawv tau txais kev paub thiab kev txawj ntse. Dhau li ntawd lawm kuv yuav ua kom paub tseeb tias thaum kawg peb yuav tsum muaj daim npav ID tus neeg tawm suab los pov thaiv kom peb cov kev xaiv tsa muaj kev ncaj ncees. Kuv yuav rov tsim kom cheeb tsam ib puag ncig txog kev lag luam zoo thoob plaws peb lub xeev uas cov neeg xaiv nyob kom pib thiab ua kom tsev neeg thiab txoj lag luam loj hlob ua ke.”

Raul J Estrada and Joe Kincaid

Yog vim li cas koj thiaj tuaj sib tw?

“Kuv xaiv los sib tw vim yog cov los xaiv ua txoj num no pheej yog cov neeg qub xwb uas twb ua ntau lwm lawm mus los "cov neeg xaiv tsa qub" uas yeej tsis muaj kev paub los tawm tsam tej yam uas tsis zoo kom tag mus uas tseem poob qab deb ntawm kev tsim kho neeg tsiv teb tsaws chaws zaum thib 3 muaj nyob rau peb ntau lub xeev tej nom tswv kav tswj, yuav tau qhia tej nom tswv kav tswj, nyob rau tej chaw ua dej num uas tseem niaj hnub ua uas tseem pheej muaj tej teeb meem zoo li hais no, kev dag ntxias, thiab lub hauv paus tsim ua rau muaj tej teeb meem los ntawm tej sij hawm ua hauj lwm nrog zej tsoom uas pheej cia rau nws tshwm sim, thiab tsuas yog tam sim no qhov yuav daws tau ces yog tawm suab xaiv tsa. Tsis yog tias ib leeg Tus Los Ua Nom xwb yuav daws tau qhov tseeb yav tag los uas twb muaj los lawm los sis tawm tsam tau rau cov neeg Minnesota. Peb tsis tuaj yeem cia kom nws poob mus ntxiv lawm. Kuv tau los mus tawm tsam.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Tau ua hauj lwm pab neeg hauv Minnesota tau 40 xyoo. Hais kom xab phas, cov thawj coj tsev kawm ntawv los tawm tsam pab pej xeem tej kev muaj cai. Hais tej nom tswv kav tswj los pab cov zej zog uas tsis muaj cib fim txaus. Muaj yeej kev hais plaub nrog tuam ceeb nroog Minneapolis. Ua tus coj lub koom haum nyob rau ntau lub xeev kom rau siab tswj hwm nrog cov koom tes, cov tawm tsam, thiab cov uas nyob lwm tog los tsim cai thiab kho tej cai uas tsis zoo rau zej tsoom neeg, tshwj xeeb yog peb cov me nyuam. Tau npaj pab pawg txuag pov hwm Tog Republican los tawm tsam thiab pov thaiv ntau lub zej zog hauv nroog los ntawm tej yam tsis zoo thiab kho tej teeb meem tshwm sim tsis zoo ntawm Floyd xyoo 2020. Yog Tus Tsim thiab Tus Thawj Coj Saib Xyuas ntawm lub koom haum American Indian Coalition of Minnesota muab cov kev pab cuam rau cov zej zog hauv nroog loj thoob plaws xeev. Tau txais daim ntawv "Huam Hwm" los ntawm tuam ceeb nroog Minnepolis rau kev pheej hmoo muab txoj sia los pab cawm cov me nyuam yaus. Tus kheej kev txhawb nqa rau cov zej zog ua kom nkag siab lawv cov kev txhawj xeeb, kam los tawm tsam.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“1. Txhua qhov teeb meem peb muaj hauv peb lub neej los ntawm kev nkag teb chaws tsis raug cai mus rau kev dag ntxias, qhov tsis zoo vim muaj neeg coob dhau, Cov neeg hloov cev poj niam txiv neej thiab qhov paub txog tias yog poj niam txiv neej, ICE kev ua rau tib neeg, tej ntaub ntawv kev yog poj niam txiv neej nyob hauv cov tsev kawm ntawv, txhua qhov no ces yeej los ntawm 1 lub hauv paus teeb meem. Sij hawm tham txog Marxist, Xam Khoos Nib Nyoos Socialist yog qhov tsis zoo rau peb lub zej zog thiab kev lag luam, thiab qhia rau cov ua hauj lwm pab zej zog ua lwm lub hauv kev xaiv los mus kho tej kev cai ua tsis zoo. Yam yuav tau qhia rau cov neeg hauv Minnesota los txheeb txog cov neeg ua twb muaj nyob hauv peb li nom tswv kav tswj, lub Tuam Tsev Hauj Lwm Ntsig txog kev kawm, tub ceev xwm, thiab tej cai uas pheej tsim los thaiv cov ua hauj lwm pab zej tsoom los ntawm tsim ntau txoj hauv kev xaiv zoo ua tau ywj pheej thiab zoo los ntawm siv cov khoos kas uas twb muaj lawm kom rov kho dua. 2. Cov los sib tw ua nom ntawm tog Republican uas yeej kheev xaiv tsa hauv nroog, muab peev xwm tswj tau kev ruaj ntseg ntawm kev xaiv tsa.”

John Krhin and Dennis Conn

Yog vim li cas koj thiaj tuaj sib tw?

“Tom qab kev sib tua ua rau Charlie Kirk raug tua tuag, Yawm Saub tau qhia kuv kom los sib tw ua tswv xeev. Yog xav kom peb tog Republic rov muaj zog dua thiab ua kom paub tseeb tias peb tus kheej thiab peb cov me nyuam xeeb ntxwv tau txais koob hmoov zoo, peb yuav tsum hloov kho nom tswv kom ua raws Kev Ntseeg Vaj Tswv Uas Cov Neeg Tsim tau tsim ua lub haus paus. Kev Ncaj Ncees, Tsev Neeg, Kev Ywj Pheej Kuv tab tom sib tw los ua tus thawj coj ntawm ib pab neeg uas xav coj peb rov qab mus rau cov hauv paus no. Peb tsis tuaj yeem daws teeb meem kev dag ntxias, kev ua phem, kev tsis hwm txoj cai lij choj thiab lus txib, los sis kev qhia zoo rau peb cov me nyuam yog tsis muaj kev pom zoo coj ncaj ncees. Thawj Tswj Hwm John Adams hais tias “Peb txoj cai lij choj tsim nyog siv tau rau ib haiv neeg uas muaj kev coj ncaj ncees thiab muaj kev ntseeg xwb.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Kuv tau ua tus xib fwb qhia vaj tswv txoj lus tau li 50 xyoo. Kuv tau tsav cov tsheb kaus av loj, tsav tsheb npav tsev kawm ntawv, tsav tsheb thauj khoom loj, ua hauj lwm tsim kho vaj tsev, thiab kuv tseem ua tus tswv ntawm ob lub lag luam me. Kuv tau tsim lub tsev nyob thiab lub tsev tshawj. Kuv yog tus tswv lub tsev lag luam uas muaj hnub nyoog 100 xyoo nyob hauv Hibbing, thiab kuv twb rov kho tshiab lub tsev ntawd lawm. Nws muaj ib lub tsev tshawj, ib lub khw kas fes, thiab cov chav tsev nyob. Kuv muab lus pab tswv yim rau cov neeg uas tab tom raug kev txom nyem hauv ntau cov xwm txheej kev ua neej. Kuv muab kev hlub tshua rau tus kheej. Nyob rau hauv lwm lo lus, kuv yog tus neeg tsim, ib tug txiv neej ntawm cov neeg, uas tau nyob ze thiab nkag siab txog tib neeg lub neej thiab pab cuam cov neeg. Thiab kuv yog ib tug tub ntxhais kawm ntawm Peb Daim Ntawv Qhia thiab Kev Cai Lij Choj nyob rau lub sij hawm ntev.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Thawj qhov, kuv yuav coj ib pab neeg los txhawb kom tib neeg rov qab paub tias txhua tus neeg lub neej muaj nqis, suav nrog tus me nyuam tseem tsis tau yug, txhua haiv neeg, cov kev ntseeg, pawg neeg, thiab cev nqaij daim tawv. Kuv yuav thov kom cov neeg tsim cai lij choj tso cai rau cov neeg tawm suab txiav txim txog kev hloov kho txoj cai lij choj los pov thaiv cov me nyuam tsis tau yug uas tseem nyob hauv niam plab. Thib ob, kuv yuav coj ib pab neeg los siv zog tawm tsam kev dag ntxias uas ua rau tsoom fwv hauv peb lub xeev puam tsuaj, thiab tseem yuav ntsuam xyuas tej kev dag ntxias uas peb lub xeev ua rau tsoom fwv teb chaws. Qhov no yuav tsum muaj kev qhib siab txhij txhua tsis zais dab tsi, thiab yuav tsum ntiab tus uas lav ris, nrog rau kev coj mus foob cov neeg uas tsis kam daws tej teeb meem ntawd. Thib peb, cov niam txiv cov kev muaj cai ntsig txog kev kawm txog lawv cov me nyuam yuav yog qhov tseem ceeb tshaj plaws hauv txoj cai kev kawm. Kuv yuav nthuav kom muaj ntau txoj xaiv tsev kawm ntawv thiab ua kom paub tseeb tias cov niam txiv muaj cai tswj yam kawm.”

Mike Lindell and Phillip C Parrish

As of publishing, this candidate has not responded.

Ross Nova and Kerry Busby

As of publishing, this candidate has not responded.

Kendall Qualls and Brian Nicholson

As of publishing, this candidate has not responded.

Tus Senator Hauv Tebchaws Meskas uas Sawv Cev Rau Xeev Minnesota: Kev Xaiv Tsa Thawj Zaug Ntawm Tog Democratic

Kurt Michael Anderson

Yog vim li cas koj thiaj tuaj sib tw?

“Txhawm rau rov ua kom Tebchaws Meskas yog ib lub teb chaws muaj zog dua, muaj kev ntseeg siab, muaj kev hlub tshua lwm tus, thiab txawj xav ua ntej txiav txim siab.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Muaj kev paub fab kev cai lij choj tau 48 xyoo suav nrog 30 xyoo sawv cev cov neeg ua liaj teb uas ntsib teeb meem nyuaj siab, tib lub sij hawm ntawd siv 30 xyoo sawv cev cov neeg mob kev noj qab haus huv fab kev kajsiab nyab xeeb; muaj kev koom tes hauv DFL qib siab tau 18 xyoo, tsis ntev los no kuj tau koom nrog cov nom tswv ywj pheej.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Foob tus thawj coj fab kev tswj thiab kev txiav txim tam sim no; ua kom tsoom fwv muaj nyiaj txaus siv thiab them qhov nuj nqis kom tag nrho nyob rau hauv 10-15 xyoo; NROG RAU kev ua kom cov txiaj ntsig pab zej tsoom rov qab muaj dua; tswj kom txhob pub muaj duab liab qab nthuav dav thiab ua peb kab lig kev cai puas tsuaj (cov lus qhia hauv online).”

Angie Craig

Yog vim li cas koj thiaj tuaj sib tw?

“Thaum xub thawj kuv twb tau tuaj sib tw vim kuv tsis nyiam txoj kev cai qub. Txawm yuav muaj teeb meem dab tsi los xij, kuv yeej ntxeev tau ib lub rooj zaum los ntawm Tog Republican. Kuv tuaj sib tw ua tus Senator vim yog lub sij hawm no xav tau cov thawj coj uas mob siab tiag, muaj kev paub dhau los, thiab tsom kwm rau kev ua kom muaj txiaj ntsig tiag, tsis yog hais lus zoo xwb. Hauv sij hawm yim lub xyoo, kuv tau muaj kaum peb tsab cai raug kos npe los ua txoj cai lij choj uas tau pab txo nqi kev saib xyuas kev noj qab haus huv thiab tawm tsam kev ntsaws nyiaj ntau dhau ntawm cov tuam txhab loj thiab kev noj nyiaj txiag hauv kev nom tswv. Kuv yuav tsis ntshai hais tawm thaum pom tej yam tsis raug, thiab kuv yuav tsis thim rov qab thaum ntsib kev tawm tsam.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Kuv tau loj hlob hauv qhov chaw txawb tsev nyob tsis ruaj chaw, thiab kuv niam yog ib leej niam tu kuv thiab kuv pog thiab peb los kuj tsis muaj kev saib xyuas kev noj qab haus huv tas li. Kuv yuav tsum tau tawm tsam kom tau txais txoj cai los saw tu kuv tus tub hlob thiab kom kuv muaj cai yuav kuv tus poj niam, Cheryl. Ua ntej kuv yuav los sib tw ua nom, kuv twb muaj ib txoj hauj lwm zoo hauv ib lub tuam txhab tsim khoom siv kho mob loj hauv Minnesota, tab sis xyoo 2018, kuv tau txiav txim siab tawm los koom kev nom tswv vim kuv pom tias Donald Trump yog ib tug uas tsim kev puas tsuaj loj. Kuv cov kev paub dhau los txog kev ua neej yuav ua rau kuv los txog qhov no—yog vim li ntawd kuv thiaj tuaj ua hauj lwm txhua hnub hauv Xab Phas txhawm rau tawm tsam sawv cev cov neeg hauv Minnesota. Tam li yog tus tswv cuab ntawm Xab Phas kuv muaj kev paub dhau los thiab ua tau ntau yam. Kuv tau sau tsab cai ntawd uas txwv tus nqi tshuaj insulin kom tsis pub dhau $35 rau Cov Neeg Laus.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Qhov kuv tsom kwm mas yog rau cov teeb meem uas cov neeg hauv Minnesota uas kuv ntsib txhawj xeeb tshaj plaws xws li kev txo nqi, kev ceev kom peb cov zej zog muaj kev nyab xeeb thiab daws cov teeb meem kev nom tswv hauv Washington uas tam sim no muaj ntau yam kev tsis ua hauj lwm zoo. Qhov no suav nrog kev daws teeb meem Xaus Saus kom ua tau hauj lwm zoo, kev tswj cov tuam txhab loj uas pheej nce nqi khoom ua rau tsev neeg ua hauj lwm raug kev txom nyem, kev ua kom kev saib xyuas kev noj qab haus huv yooj yim rau sawv daws los ntawm kev tsim kom muaj Medicare rau txhua tus uas xav siv “ uas yog hauv kev xaiv kho mob rau pej xeem, “ thiab tiv thaiv peb cov zej zog kom tsis raug kev puas tsuaj los ntawm tsoom fwv tam sim no cov cai uas tsis muaj kev lav ris thiab tsis ceev faj. Nyob rau hauv Xab Phas kuv yuav pov thaiv cov txiaj ntsig uas tib neeg tau siv zog ua hauj lwm khwv tau los tas li thiab yuav muab cov tsev neeg ua hauj lwm thiab cov tsev neeg nruab nrab saib ua qhov tseem ceeb tshaj li cov pawg neeg muaj nyiaj tshwj xeeb.”

Peggy Flanagan

Yog vim li cas koj thiaj tuaj sib tw?

“Kuv tuaj sib tw ua tswv cuab hauv Xab Phas Tebchaws Meskas vim yog kuv xav kom tib neeg pej xeem tuaj yeem ua neej nyob tau raws lawv xav nyob. Kuv loj hlob los ntawm kuv niam uas yog ib leeg niam tu kuv, thaum ntawd kuv xav tias zoo li txhua yam yuav puas tsuaj nyob rau txhua lub sij hawm. Kuv vam khom rau lwm cov khoos kas pab kuv xws li lub khoos kas pab vaj tsev nyob Kem 8, khoos kas pab saib xyuas me nyuam, thiab Medicaid kom peb thiaj hla dhau lub sij hawm. Muaj ntau tus neeg nyob hauv Minnesota twb siv zog ua neej lawm tab sis tseem poob qab lwm tus. Kuv yog ib tug neeg tuaj sib tw hauv kev xaiv tsa no uas tsis kam txais nyiaj pab ntawm PAC vim kuv ntseeg tias cov tuam txhab loj thiab cov neeg muaj nyiaj ntau twb muaj neeg sawv cev txaus hauv Washington lawm. Kuv tuaj sib tw vim kuv xav sawv tawm tsam tej yam cov tuam txhab muaj hwj chim ntau dhau thiab tawm tsam txhawm rau nrhiav hauv kev los daws cov teeb meem ua kom tsoom fwv rov qab los ua hauj lwm rau neeg pej xeem dua ib zaug ntxiv.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Kuv lub neej qhia kuv tias dab tsi ua mus tau thaum cov neeg muaj lub cib fim uas ncaj ncees. Cov khoos kas tsoom fwv pab kom peb hla dhau lub sij hawm nyuaj, thiab kuv tau siv kuv txoj hauj lwm los tawm tsam ua kom paub tseeb tias lwm tus muaj cib fim ib yam nkaus. Kuv yog tus neeg uas hnub nyoog yau tshaj plaws uas raug xaiv los ua tswv cuab hauv Pab Pawg Thawj Coj Saib Xyuas Tsev Kawm Ntawv Ntawm Minneapolis, tau cob qhia ntau txhiab tus neeg ua hauj lwm hauv zej zog los ntawm Wellstone Action, tau ua tus coj ntawm Children's Defense Fund-Minnesota, tau ua tus tswv cuab hauv Pawg Sawv Cev Xeev Minnesota, thiab tam sim no ua Tus Tswv Xeev Lieutenant. Kuv yog tus coj sawv los tawm tsam kom cov neeg ua hauj lwm tau nyiaj hli siab, tsim kom hnub so nyob nrog tsev neeg thiab kho mob uas tau txais kev them nyiaj, muab mov noj pub dawb rau cov me nyuam kawm ntawv, tsim ib txoj cai txo se pab cov me nyuam uas yog ib txoj cai zoo tshaj plaws hauv lub teb chaws, thiab txo nqi tshuaj insulin. Kuv zoo siab heev uas tau txais Senator Tina Smith txoj kev txhawb nqa, nws kuj yog tus uas tau dhau los ntawm ib txoj kev li kuv pib ua Tus Tswv Xeev Lieutenant ces mam los ua tus Senator.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Txhua qhov chaw kuv mus, cov tib neeg yeej hais rau kuv tias lawv them tsis taus lawv tej nqi kev ua neej nyob txhua hnub. Cov neeg hauv Minnesota txhawj txog tus nqi tsev, nqi saib xyuas kev noj qab haus huv, nqi saib xyuas me nyuam, nqi khoom noj haus, lawv tseem txhawj tias lawv cov nyiaj hli puas yuav txaus siv mus txog thaum kawg. Cov neeg twb dhuav cov nom tswv pheej hais kom lawv txaus siab txais yam tsawg dua lawv muaj, hos cov tuam txhab loj thiab cov neeg nplua nuj ces yim nplua nuj zuj zus tuaj. Lawv xav tau cov thawj coj uas yuav tsis cia cov neeg muaj nyiaj ntau los tswj kev nom tswv, yuav tsis ntshai tawm tsam cov neeg muaj hwj chim, thiab yuav sib zog tsim cov cai uas pab cov neeg ua hauj lwm ua ntej. Yog vim li ntawd kuv thiaj li siv zog tawm tsam kom muaj Medicare rau Txhua Tus, kom muaj kev saib xyuas me nyuam rau txhua tus, nce nyiaj hli qib qis ntawm tsoom fwv, pov thaiv Xaus Saus thiab Medicare, txwv tsis pub Wall Street yuav tag nrho cov zej zog, thiab yuam kom ICE lav ris rau yam lawv tau ua thiab kho peb txheej teg kev ua hauj lwm nkag teb chaws uas muaj teeb meem.”

George H. Kalberer

As of publishing, this candidate has not responded.

Peter John Murgic

As of publishing, this candidate has not responded.

Billy Nord

Yog vim li cas koj thiaj tuaj sib tw?

“Kuv tuaj sib tw vim tias, zoo li ntau cov neeg hauv Minnesota Uas Yog Neeg Ua Hauj Lwm, kuv ntxhov siab heev vim cov neeg sawv cev hauv Xab Phas uas peb xaiv tsa tam sim no tsis daws tej teeb meem li. Peb xav tau ntau tus neeg sawv cev zoo li peb los pab peb: cov neeg uas muaj kev paub dhau los hauv lub ntiaj tseeb tiag, tus uas nkag siab tob txog tej teeb meem kev nyuaj niaj hnub no hauv kev them daim ntawv sau nqi, tu peb cov me nyuam, ua lub neej nyob hauv ib qho xwm txheej uas txhawj xeeb thiab ntshai tas li vim yog kev ntxhov siab tsoom fwv teb chaws txhob txwm tsim. Kuv tsis txais nyiaj pub rau xaiv tsa los ntawm leej twg li, yog li thaum kuv los ua nom tswv, kuv tsis tas yuav mloog los sis ua raws li cov neeg pub nyiaj ntawd xav tau, kuv tsuas yog yuav lav ris rau cov pej xeem hauv Minnesota xwb, qhov no ua rau kuv muaj kev ywj pheej los tsim cai tswj hwm cov tuam txhab raws li qhov zoo rau pej xeem. Tib cov tuam txhab ntawd twb ua rau peb nyuaj siab txaus lawm los pheej tseem ua rau Cov Neeg Ua Hauj Lwm nyuaj siab thiab.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Kuv tau ua hauj lwm ua tus neeg ntxuav tais diav, kuv ua hauj lwm hmo ntuj hauv lub chaw ua hauj lwm thiab hauv kev tu vaj tsev tib si, kuv tau ua niam txiv nyob hauv tsev saib xyuas me nyuam, kuv tau muag khaub ncaws thiab tam sim no kuv ua hauj lwm 9 teev sawv ntxov - 5 teev tsaus ntuj txog kev tswj qhov ua tau zoo. Kuv tsev neeg, tam sim no ua neej nyob tos nyiaj hli ib hli dhau ib hlis xwb. Peb xav tau cov neeg ua hauj lwm tiag los pab coj peb lub teb chaws kom mus txuas ntxiv rau yav tom ntej, thiab koom tes tsim cov cai lij choj uas cuam tshuam ncaj qha rau peb lub neej ntau dua. Peb xav tau cov thawj coj uas tsis txhob xav tias lawv yog tus thawj coj loj tshaj, tab sis xav kom muaj cov neeg sawv cev uas sawv nrog thiab mloog cov pej xeem ntau dua.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“1. Tawm tsam cov Khw Muag Khoom Loj uas txhob txwm nce nqi khoom. Cov tuam txhab loj uas muaj nqis ntau tshaj txhiab lab duas las xws li Walmart tseem pheej nce nqi khoom kom siab, txawm lawd twb khwv tau nyiaj paj ntau tshaj yav tas lawm los, pheej tseem siv lub sij hawm los ntawm Trump cov se rau khoom tuaj txawv teb chaws uas raug hais tias tsis raug cai tam sim no thiab kev ua tsov rog Iran los ua qhov laj thawj rau kev nce nqis. 2. Kev xaus kev lag luam tuav pov hwm noj qab haus huv. Cov nyiaj uas raug txiav tawm ntawm peb cov nyiaj hli txhua lim tiam tsim nyog raug muab coj ncaj nraim mus siv rau txheej teg kev ua hauj lwm saib xyuas kev noj qab haus huv kom lav tias peb yuav tau txais kev saib xyuas thaum peb xav tau, tsis yog muab mus rau lub tuam txhab uas nrhiav nyiaj los ntawm kev tsis kam muab kev saib xyuas rau peb thaum peb xav tau kev saib xyuas tshaj plaws. 3. Rov qab tsim txoj kev saib xyuas uas pab lees paub tias yog poj niam los txiv neej rau cov tsev neeg ua tub rog. 4. Tshem tawm Lub Tuam Tsev Hauj Lwm Saib Xyuas Kev Ruaj Ntseg Hauv Tebchaws, kev xaus ICE. 5. Muab Narcan pub dawb rau txhua tus, xa los ntawm USPS. 6. Muab cov khes div se hnub so rau txhua cov neeg so hauj lwm. Kev saib xyuas tus kheej yog kev saib xyuas kev noj qab haus huv.”

Tus Senator Hauv Tebchaws Meskas uas Sawv Cev Rau Xeev Minnesota: Kev Xaiv Tsa Thawj Zaug Ntawm Tog Republican

Bob Carney Jr.

As of publishing, this candidate has not responded and MPR News could not find any information about the candidate.

Ahmad R. (Raafat) Hassan

Yog vim li cas koj thiaj tuaj sib tw?

“Kuv tuaj sib tw vim tebchaws Meskas xav tau tus thawj coj uas saib tib neeg ua qhov tseem ceeb ua ntej. Kuv tuaj rau lub teb chaws no tam li yog ib tug neeg tsiv teb tsaws chaws thiab kuv tau tsim tau ib lub neej zoo los ntawm kev mob siab ua hauj lwm thiab kev mob siab rau. Kuv ntseeg tias txhua tus Neeg Meskas tsim nyog tau txais tib lub hwv tsam. Kuv xav coj kev txawj xav kom muaj laj thawj, kev paub dhau los hauv lub ntiaj teb tiag, thiab kev mob siab tiag los ua hauj lwm pab cov pej xeem hauv Minnesota.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Kuv txoj hauj lwm suav nrog kev yuav muag vaj tsev, txoj cai lij choj, kev ua tswv txoj lag luam me, thiab kev tswj kev pab cuam khoom noj. Kuv tau ua hauj lwm nrog cov qub tub rog, tau ua tswv thiab ua ntau cov lag luam, thiab tau pab kuv lub zej zog hauv ntau lub luag hauj lwm sib txawv. Cov kev paub dhau los no tau ua rau kuv nkag siab tob txog yam teeb meem cov neeg Meskas uas ua hauj lwm ntsib txhua hnub thiab ua rau paub tias kev ua tus thawj coj muaj zog, muaj kev lav ris zoo li cas.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Kev lag luam, kev ua txhaum, kev nkag teb chaws, kev saib xyuas kev noj qab haus huv, thiab hluav taws xob yog qhov teeb meem uas cov neeg hauv Minnesota txhawj xeeb tshaj plaws. Cov tsev neeg ntsib teeb meem kev nyuaj vim cov nqi pheej nce thiab txhawj xeeb txog kev tiv thaiv nyab xeeb rau pej xeem. Kuv tau cog lus tias yuav txhawb kom peb li kev lag luam muaj zog dua, txhawb nqa tub ceev xwm, tiv thaiv kom peb cov ciam teb muaj kev ruaj ntseg, saib xyuas peb cov qub tub rog thiab tus laus, thiab nrhiav txoj kev kom Meskas muaj kev ywj pheej hauv kev tsim hluav taws xob.”

Cynthia Gail

Yog vim li cas koj thiaj tuaj sib tw?

“Vim yog kuv hlub kuv cov tub ntxhais kawm. Lawv xav tau kuv thiab kuv xav tau lawv. Peb sawv daws tuaj yeem koom tes ua ke los tsim kom muaj kev hloov pauv. Kuv cov soj lus zoo tshaj plaws yog tswj koj tus cwj pwm. Thaum tej yam nyuaj dhau ces hais raws kuv qab. “Kuv muab qhov no rau Ms. Gail” thiab yuav siv zog ua txoj hauj lwm kom zoo. Yexus hais hauv phau ntawv Matthew thaum 11:30 tias “kuv rab khais yog yooj yim ris thiab kuv lub nra yog sib xwb”. Kuv hnov tau tias Yawm Saub yog tus coj kuv los rau txoj hauj lwm hu no.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Kev muaj yeej tej kev txom nyem.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Kev saib xyuas kev noj qab haus huv vim yog cov tsev neeg tsis tuaj yeem them taus. Qhov khoom noj peb noj thiab yog vim li cas peb thiaj tsis taug qab qhov lub cev tsis txais tau qab zib thiab kab mob celiac. Lub laj thawj yog dab tsi? Puas yog nws tab tom nce ntxiv? Cov teeb meem tseem ceeb tshaj plaws - Cov se thiab kev nthuav tawm tsis raug, cov xov xwm tuaj yeem pab Minnesota. Cov tshuaj kho mob thiab txoj hauv kev lawv cuam tshuam rau peb cov me nyuam. AI thiab kev ua txhaum cai txog kev ntiag tug nrog rau kev siv AI kho daim duab cov me nyuam yaus. Yog vim li cas ADHD thiaj tswj tsis tau? Yuav ua li cas thiaj pab tau cov tub txhais kawm kom rov qab los kawm li qub. Tsim kom muaj kev sib koom siab thiab kev sib raug zoo ntawm cov hluas hnub nyoog 19-21 xyoo, nrog rau kev cob qhia los ua hauj lwm rau peb lub teb chaws. Kev cob qhia fab lub cev, fab siab ntsws, thiab kev tiv thaiv tus kheej nrog rau tej cov kev txawj txog kev ua neej nyob - hwm peb lub teb chaws thiab txoj cai lij choj. Tsis txhob tso tseg koj cov cai kev hloov kho xub thawj thiab thib ob.”

Joyce Lacey

Yog vim li cas koj thiaj tuaj sib tw?

“Kuv txoj kev xaiv tsa yog xav sawv cev rau cov neeg uas feem ntau tsis muaj hwj chim, tsis muaj suab, xav txhawb kom txhua tus neeg muaj kev ncaj ncees thiab kev ruaj ntseg, thiab ua tej kev hloov kho raws txheej teg kev ua hauj lwm kom pab tau tib neeg nyob tau zoo dua. Qhov no cuam tshuam nrog kev lees paub cov kev siv zog yav dhau, muab qhov kev hloov kho txhij txhua saib ua qhov tseem ceeb thiab pab txhawb cov zej zog uas yav tag los tsis muaj hwj chim kom muaj peev xwm tsim tau ib lub neej yav tom ntej ncaj ncees thiab muaj kev ruaj ntseg rau phaum tom ntej. Kuv lub luag hauj lwm yog los lees paub tus uas nyob hauv lub neej kaj siab lug, cov me nyuam; tus uas nyob hauv lub neej nyuaj, tus laus; tus uas nyob rau hauv lub neej tsaus ntuj nti, cov neeg mob, cov neeg xav tau kev pab thiab cov neeg xiam oob qhab thiab tsim cov kev hloov tshiab thiab cov txheej teg kev ua hauj lwm tshiab kom peb lub neej muaj kev ruaj ntseg. Peb yuav tsum pov thaiv cov neeg txom nyem tshaj plaws. Kuv vam tias yuav tsim tau tsab cai kom tsis pub muaj lag luam tib neeg thiab siv tib neeg tsis raug cai. Peb yuav tsum hwm Txoj Cai Lij Choj!”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Kuv tau siv kuv lub neej feem ntau los sawv cev tawm suab txhawb tib neeg cov cai. Dhau li ntawd lawm, kuv tau siv kuv lub neej los ua hauj lwm pab dawb kom pab nrhiav nyiaj txiag thiab ua kom paub txog tej kab mob tsim nyog tau txais kev pab, xws li kab mob khees xaws, kab mob multiple sclerosis, kab mob plawv, kab mob ntshav qab zib thiab kab mob alzheimer thaum tsev neeg thiab cov phooj ywg raug cov mob no. Thaum kuv paub tias muaj ntau dua 1.3 lab tus neeg laus uas raug lwm tus saib xyuas thiab tswj hwm lawv cov nyiaj txiag nrog rau cov khoom muaj nqis ntau dua tsib caug lab duas las, tom qab kuv niam raug yuam zoo li xwm txheej no, kuv paub tias kuv yuav tau sawv los tiv thaiv cov neeg uas tsis muaj peev xwm tiv thaiv tus kheej. Yuav tsum mus kawm cob qhia plaub caug teev thiaj tau txais lub luag hauj lwm hu ua "Tus Saib Xyuas Tshaj Lij"! Pom tseeb lawm tias, nws tsis muaj laj thawj! Tsis muaj ib tug neeg twg yuav tsum raug yuam kom raug lwm tus saib xyuas thiab tswj nws yam nws tsis yeem, ua phem rau lwm tus, txhawm kom tau nyiaj, dag ntxias txhawm rau txeeb lawv tej khoom muaj nqis, cov kev cawm txoj sia thiab kev muaj cai.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Cov teeb meem tseem ceeb tshaj plaws kuv tab tom sib tham nrog cov neeg tawm suab yog kev ua kom tsis txhob muaj kev dag ntxias hauv Minnesota. Ua kom paub tseeb tias peb tej vaj tsev raug kho thiab kev kawm raug muab saib ua qhov tseem ceeb. Cov kev txhawj xeeb tias peb cov kev muaj cai tsis muaj leej twg tshem tawm, cim tseg hauv Daim Ntawv Tshaj Tawm Txog Kev Ywj Pheej, tau raug txo qis zuj zus raws txoj cai lij choj, ua rau ntau cov neeg tawm suab txhawj xeeb. Qhov no pom meej tshwj xeeb heev thaum cov neeg mob kab mob COVID raug muab tso nyob hauv cov chaw saib xyuas ncua sij hawm ntev thiab tom qab ntawd cov neeg nyob hauv qhov chaw ntawd kuj kis tau kab mob COVID thiab, es tsis txhob coj lawd mus rau hauv Chav Kho Mob Xwm Txheej Ceev, muab lawd tso rau hauv Lub Chaw Saib Xyuas Neeg Mob Ntu Kawg yam tsis muaj kev pom zoo los ntawm tsev neeg. Lawd tsis yog neeg mob ncua kawg thiab tsis tsim nyog muab tso rau hauv Lub Chaw Saib Xyuas Mob Ntu Kawg. muaj 4,070 cov neeg nyob hauv tuag lawm. Vim cov qauv cai, cov tsev neeg thiaj tsis tau txais kev tso cai mus hais lus zoo rau tus neeg lawv hlub zaum kawg.”

Patrick Munro

As of publishing, this candidate has not responded.

Adam Schwarze

Yog vim li cas koj thiaj tuaj sib tw?

“Minnesota tab tom poob nyob hauv xwm txheej kub ntxhov. Muaj ntau txhiab lab duas las raug nyiag hauv ib qho kev teeb meem dag ntxias cuam tshuam nrog kev saib xyuas me nyuam yaus. Tus lwm tswv xeev uas pom txhua yam teeb meem ntawd tshwm sim thiab tam sim no xav tau kev nce qib hauj lwm. Kuv tuaj sib tw vim qee tus neeg yuav tsum sawv rov qab los tawm tsam thiab kuv tau siv tag nrho kuv lub neej yav laus los rau kev tawm tsam, tsis yog sawv ntawm ib sab ntsia xwb. Kuv rau npe ua tub rog Marines thaum kuv muaj hnub nyoog 18 xyoo tom qab qhov xwm txheej 9/11 vim yog kuv ntseeg hauv txoj kev cog lus ntawm Meskas. Kuv tseem ua. Cov tsev neeg hauv Minnesota tsim nyog muaj ib tug senator uas yuav txiav tau kev siv nyiaj ntau dhau, kev tiv thaiv kom ciam teb muaj kev ruaj ntseg, yuam cov nom tswv noj nyiaj txiag kom los lav ris rau yam lawv ua, thiab tsis thov txim rau tej txiaj ntsig uas tswj li qub. Kuv tsis yog ib tug neeg ua nom ua tswv uas ua hauj lwm nom tswv tas kuv lub neej. Kuv yog ib tug tub rog. Thiab qhov ntawd yog yam tseem ceeb heev rau lub sij hawm no.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Kuv yug hauv St. Paul, kuv yog ib tug me nyuam raug sawv los tu, thiab kuv muaj hmoo heev uas kuv niam yug tiag xaiv los yug kuv. Kuv loj hlob nyob hauv Bloomington, thiab kuv tau kawm txhua yam kuv yuav tsum tau paub hais txog kev ua tus coj hauv lub ntshav ntaus hockey. Thaum kuv muaj 18 xyoo kuv tau koom nrog pab tub rog Marines, tom qab ntawd kuv dhau los ua ib tug TUB ROG Nkoj (Navy SEAL), thiab kuv raug xa mus ua hauj lwm ntau tshaj cuaj zaug hauv 70 lub teb chaws. Kuv tau ua tus thawj coj ntawm Pab Pawg Tub Rog Ceeb Toom Xwm Txheej Kub Ntxhov nyob hauv Cheeb Tsam Sab Hnub Tuaj Nruab Nrab Teb. Kuv twb keev mus sib ntaus sib tua dua los lawm. Kuv paub tias kev ua thawj coj thaum muaj kev kub ntxhov txhais li cas, paub yuav txiav txim siab txog tej yam nyuaj li cas, thiab paub tias yuav tsum lav ris rau txoj hauj lwm uas tau txais li cas. Thaum kuv rov los tsev, kuv pom Minnesota tab tom muaj teeb meem loj tab si kuv pom tias cov nom tswv tsis mob siab daws qhov teeb meem ntawd li thiab lawv tsuas sib liam thiab sib cav xwb, qhov ntawd ua rau kuv thev tsis taus li lawm. Thaum kuv txais ib txoj hauj lwm lawm kuv yuav rau siab ntso ua kom tiav xwb: yog muaj teeb meem kuv yuav nrhiav kev daws, kuv yuav tsis hais vim ub vim no kuv thiaj ua tsis tiav. Washington, D.C. xav tau cov yam zoo li ntawd ntau heev.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Muaj peb yam uas kuv ib txwm ntsib tsis hais kuv yuav mus rau qhov twg los xij. Qhov xub thawj yog qhov pom tau tseeb, nws yog nyiaj siv hauv lub neej. Cov tsev neeg tab tom raug kev nyuaj vim se thiab tus nqi kev ua neej nce siab zuj zus tab sis cov nom tswv hauv St. Paul tseem qhuas lawv tus kheej tias lawv ua tau zoo. Qhov thib ob yog kev lav ris. Peb tsuas saib hauv peb lub xeev xwb, ib txhiab nyiaj daus las tau ploj mus vim cov khoos kas saib xyuas me nyuam muaj kev dag ntxias, thiab tsis muaj leej twg raug kaw hauv tsev loj cuj. Cov neeg hauv Minnesota xav tau lus teb. Thaum kawg, kev ruaj ntseg — kev tiv thaiv kom ciam teb muaj kev ruaj ntseg, kev tswj txoj cai lij choj kev nkag teb chaws, thiab kev ua kom paub tseeb tias peb cov kev yeej muab kev nyab xeeb. Cov no tsis yog kev sib cav txog cov cai nyob hauv ntawv xwb. Cov no yog tej lus sib tham uas cov tsev neeg pheej tham nyob ntawm rooj noj mov hauv tsev, thiab muaj nyob hauv txhua lub khauj tim uas kuv tau mus xyuas. Cov tsev neeg uas siv zog ua hauj lwm tsis xav tau ntau yam dab tsi Lawv tsuas xav ua neej nyob kom kaj siab thiab nyab xeeb nyob hauv lawv lub zej zog xwb. Ntawd yog yam kuv tab tom tawm tsam ua kom tau.”

Michele Tafoya

As of publishing, this candidate has not responded.

Tom Weiler

Yog vim li cas koj thiaj tuaj sib tw?

“Los daws cov teeb meem uas txhim kho koj lub neej thiab coj cov neeg hauv Minnesota los sib sau ua ke. Cov neeg hauv Minnesota uas kuv tau ntsib thaum kuv mus nrhiav kev xaiv tsa, txhua tus puav leej pom zoo txog ob yam no: • Peb muaj cov teeb meem hauv Minnesota • Yeej tsis muaj ib tug nom tswv twg kam nqis tes ua hauj lwm tiag los daws cov teeb meem ntawd li. Kuv yuav. Kuv yuav siv kuv qhov kev paub tiag uas kuv tau ua hauj lwm los tau ntau tshaj 25 xyoo los pab daws teeb meem ntawd thiab tsim txiaj ntsig hauv fab kev tiv thaiv kev ruaj ntseg hauv teb chaws, kev ua hauj lwm thiab kev tswj cov nkoj qab thus dej, txoj cai txog pej xeem thiab txawv teb chaws, kev npaj peev nyiaj, kev tsim kho vaj tsev, tej vaj tsev tseem ceeb, thiab kev tswj lub zog nuclear los daws cov teeb meem, ua kom lub neej ntawm cov neeg hauv Minnesota zoo dua, thiab rhuav tshem txoj cai zoo li qub hauv peb Xab Phas Tebchaws Meskas. Kuv cov kev daws teeb meem feem ntau ces yog xav hloov kho tsoom fwv kom tsis txhob muaj kev tswj hwm ntau dhau, kom tsoom fwv siv zog pab cov neeg hauv Minnesota tiag, es tsis yog siv sij hawm ntau rau cov kev ua hauj lwm hauv tsoom fwv xwb.”

Tej kev paub hauv koj lub neej lossis hauv koj txoj hauj lwm twg tau ua rau koj txiav txim siab los sib tw rau txoj hauj lwm no?

“Tag nrho kuv lub neej thiab kev paub dhau los txog kev ua hauj lwm tau ua rau kuv mus txog qhov no, tab txawm tias qhov no tsis keev yog lub phiaj xwm los xij. Txawm li cas los xij, lub sij hawm ntawd, kuv lub phiaj xwm yog kev ua tus coj hauv Pab Pawg Tub Rog Nkoj Qab Thus Dej Ntawm Teb Chaws Meskas, lub phiaj xwm ntawd hloov nyob rau ncua sij hawm, yam kuv xav, kuv mus teem caij kuaj li ib txwm nyob ntawm Lub Chaw Kho Mob Walter Reed xwb, thaum kuaj ntawd, lawv qhia kuv tias kuv muaj Tus Kab Mob Parkinsons Theem Pib. Tus Kab Mob Parkinsons ua rau kuv yuav tsum tau tawm kev ua tub rog nyob hauv Nkoj (Navy), tab sis kuv ntseeg tias thaum ib lub qhov rooj kaw lawm, lwm lub yuav qhib. Dhau ntawm cov kev paub dhau los uas tau sib tham saum toj no lawm, cov qauv cai kev ua tus thawj coj thiab kev ua siab ncaj uas tau tsim los ntawm tus txiv neej thiab tus poj niam thawj coj nyob ntawm hiav txwv yuav pab tau kom kuv tuaj yeem tsim tau kev txhawb nqa thiab siv txoj cai lij choj uas txhim kho cov kev ua neej ntawm Minnesota thiab txhua Cov Neeg Meskas.”

Cov teeb meem tseem ceeb tshaj plaws uas koj tab tom tham nrog cov neeg pov npav xaiv tsa yog dab tsi thiab yog lub laj thawj dab tsi?

“Ua ntej no, mloog yam teeb meem neeg muaj. 3 yam teeb meem loj uas yog yam cov neeg nyob hauv Minnesota txhawj xeeb tshaj plaws yog nyiaj siv hauv lub neej, kev dag ntxias, thiab kev xav tias muaj kev sib cais loj zuj zus ntawm cov neeg hauv Minnesota. Cov kev daws teeb mem: • Cov neeg hauv Minnesota lub neej yuav yooj yim dua yog peb tshem tawm kev dag ntxias, txo tau kev siv nyiaj ntawm nom tswv uas tsis tsim nyog, kev npaj nyiaj txiag kom muaj lub luag hauj lwm los ntawm cov nom tswv uas raug xaiv tsa, thiab txhawb kom lag luam loj hlob kom tsim tau hauj lwm ntau dua, muaj nyiaj tau los zoo dua o Kev dag ntxias “ kev lav ris, kev raug kaw, tshawb xyuas kom sai kom tiv thaiv tsis pub muaj kev ua txhaum ntxiv o Kev Siv Nyiaj Tsis Tsim Nyog thiab Kev Npaj Peev Nyiaj “ Yog Tsis Muaj Peev Nyiaj, Kuj Tsis Muaj Tsab Cai Nrhiav Nyiaj o Kev Ua Kom Lag Luam Loj Hlob thiab Tau Hauj Lwm Zoo Dua “ Tswj kom cov se hauv xeev tsis siab kom muaj peev xwm sib tw tau, khaws cov khoom muaj nqis nyob rau hauv peb cov cheeb tsam toj roob sab qaum teb ntawm peb lub xeev, thiab txo cov cai tswj ntawm tsoom fwv rau kev ua liaj teb. • Tshem tawm qhov teeb meem ntawm kev faib cheeb tsam xaiv tsa uas tsis ncaj ncees los ntawm kuv Tsab Cai Kev Faib Cheeb Tsam Xaiv Tsa Uas Tsis Ncaj Ncees Xaiv Tsa Tus Senator Uas Muaj Kev Ncaj Ncees, Kev Coj Ncaj.”

Royce White

As of publishing, this candidate has not responded.